Namaskar kisan bhaiyo, aap sabke liye ek bahut hi badi khushkhabri hai. Agar aap bhi apne khet me diesel engine se pareshan ho, har baar diesel ka kharcha badh raha hai to ab tension lene ki jarurat nahi hai.
Kendra sarkar ne PM Kusum Yojana 2025 shuru ki hai. Is yojana ka pura naam hai Pradhan Mantri Kisan Urja Suraksha evam Utthaan Mahabhiyan. Sarkar ka kehna hai ki ab kisan bhai Annadata ke saath Urjadata bhi banenge.
Mere ek chacha ji ne pichle saal hi is yojana se solar pump lagwaya hai, ab unka diesel ka saal ka 50-60 hajar ka kharcha bilkul bach raha hai.
PM Kusum Yojana Kya Hai?
Dekho bhai simple bhasha me samjho, is yojana me 3 cheeze milti hai.
Pehla to agar aapke paas banjar zameen padi hai jisme kheti nahi hoti to waha aap solar plant laga sakte ho 2 MW tak ka. Usse bijli banegi aur sarkar aapse bijli kharidega. Har mahine aapko kiraya milta rahega.
Dusra, jo sabse zyada chal raha hai, wo hai solar pump. Sarkar 20 lakh kisan ko solar pump de rahi hai. Isme aapko 60% tak subsidy milti hai.
Teesra, agar aapke paas pehle se bijli wala pump hai to usko bhi solar me badal sakte ho.
Kitna Paisa / Subsidy Milega?
Ye sabse main sawal hai. Bhai isme aapko total 60% subsidy milti hai. 30% kendra sarkar degi, 30% rajya sarkar degi.
Aapko sirf 10% paisa apni jeb se dena hai, baaki 30% ka bank loan ho jayega.
Jaise UP me abhi 2025-26 me 40,521 pump bat rahe hain. Waha 2 HP ke pump par lagbhag 98,593 rupye ki subsidy mil rahi hai aur 7.5 HP aur 10 HP ke bade pump par to 2 lakh 54 hajar tak ki subsidy mil rahi hai. Socho kitna fayda hai.
Aur sabse badi baat, ek baar solar pump lag gaya to 25 saal tak bijli free. Diesel ka jhanjhat khatam.
Kaun Apply Kar Sakta Hai?
- Aapke naam par kheti ki zameen honi chahiye, chahe 1 acre hi kyu na ho.
- Aadhar card aur bank khata hona chahiye.
- Aap kisi bank ke defaulter nahi hone chahiye.
Chote kisan ko isme pehle mauka diya jata hai.
PM Kusum Yojana Me Online Apply Kaise Kare?
Bhai apply karna bahut aasan hai, aap ghar baithe mobile se kar sakte ho.
- Sabse pehle aapko official website par jana hai – pmkusum.mnre.gov.in ya apne rajya ki agriculture.up.gov.in par.
- Waha par PM Kusum Yojana ka option milega, uspar click karo.
- Ab Component B ya Component C chuno, zyadatar log Component B (standalone solar pump) chun rahe hain.
- Apna Aadhar number, Khatauni, Bank Passbook aur ek photo upload kar do.
- Last me 5000 rupye token money online jama karna hoga.
Uske baad aapka naam e-lottery me jayega. Lottery me naam aate hi aapko company se phone aa jayega aur 7-10 din me pump aapke khet me lag jayega.
Meri Salah
Bhaiyo dekho, ye yojana 31 March 2027 tak hi hai. Har saal subsidy kam hoti ja rahi hai. Isliye agar aap soch rahe ho to jaldi apply kar do. Padosi jile me abhi form bhare ja rahe hain, 15 December tak last date hai UP me.
To der kis baat ki, aaj hi apply karo aur diesel ke kharche se chutkara pao.
Agar aapko form bharne me koi dikkat aa rahi hai to niche comment karo, mai aapki puri madad karunga.
PM Kusum me kitna paisa dena padta hai?
“Isme aapko apni jeb se bahut kam paisa lagana hai. Maan lo pump ka total kharcha 1 lakh hai to aapko sirf 10 hajar rupye hi dena hai. Baaki 60 hajar rupye sarkar de degi, usme 30 hajar kendra sarkar aur 30 hajar rajya sarkar degi. Aur jo 30 hajar bach gaya uske liye aap aasani se bank se loan le sakte ho.”
Solar pump kitne din me lagta hai?
“PM Kusum Yojana me form bharne se lekar khet me solar pump lagne tak aam taur par 45 se 90 din lag jate hain, matlab lagbhag dedh se 3 mahina ka time lagta hai.”
Iska form offline bhi bhar sakte hai kya?
“Haan bhai, PM Kusum ka form offline bhi bhara ja sakta hai. Lekin ye aapke rajya par depend karta hai, kyunki har state me iska niyam alag-alag hai. Kuch state me offline form jama hota hai, kuch me sirf online hi hota hai.”